UDSM Yakana chuo Kukumbwa Kipindupindu

MAKAMU Mkuu wa Chuo Kikuu cha Dar es Salaam (UDSM), Profesa Rwekaza Mukandala amesema wanafunzi wawili wa chuo hicho Kampasi ya Mlimani walioripotiwa kuumwa tumbo, hawana ugonjwa wa kipindupindu, bali walipata adha hiyo baada ya kula kwenye mgahawa wa Cafeteria One chuoni hapo.

Alitoa ufafanuzi huo jana Dar es Salaam kutokana na uvumi kwamba ugonjwa wa kipindupindu umeingia chuoni hapo na tayari baadhi ya wanafunzi wanaugua ugonjwa huo.

Akizungumzia hilo, Profesa Mukandala alisema ni kweli wanafunzi wawili miongoni mwa wanafunzi waliokula chakula katika moja ya Cafeteria chuoni hapo, walipata shida ya kuumwa tumbo na kupelekwa kwenye hospitali ya chuo kwa matibabu.

Alisema baada ya uchunguzi, ilibainika wanafunzi hao hawakuwa na ugonjwa wa kipindupindu, bali walipata maradhi ya tumbo kutokana chakula hicho. 

 

“Walipimwa na hawakuwa na tatizo la kipindupindu, ila huyu mzabuni anayehudumia Kafteria One ana matatizo na usafi, na tulishamsitisha kutoa huduma, ila alikimbilia mahakamani na kurejeshwa,” alisema Profesa Mukandala.

Alisema baada ya kurudishwa uongozi umeamua kumuacha, kwani mkataba wake unaisha mapema mwakani na kusema utakapoisha hawataendelea naye, akisisitiza kuwa, pamoja na kuwa na matatizo ya usafi, pia alikiuka maagizo ya kuongeza bei ya vyakula bila taarifa.

Hata hivyo, Profesa Mukandala amewasisitiza wanafunzi chuoni hapo kuhakikisha wanazingatia usafi ili kujiepusha na maambukizi ya maradhi na kuutaka pia uongozi wa mgahawa huo, kuhakikisha wanazingatia usafi na kuboresha vyakula, kwa kuwa wanahudumia jumuiya kubwa