Kati ya viwanda 131 vilivyobinafsishwa 90 tu vinafanya kazi

SERIKALI imesema kati ya viwanda 131 vilivyobinafsishwa ni viwanda 90 tu ambavyo vinafanya kazi.

 

Taarifa hiyo ilitolewa bungeni jana na Naibu Waziri wa Viwanda na Biashara, Janeth Mbene wakati akijibu swali la Mbunge wa Ileje, Aliko Kibona (CCM).

 

Katika swali lake Kibona alitaka kujua mpango wa Serikali wa kufufua viwanda vilivyokufa Mkoa wa Mbeya na mikoa mingine ili kukabiliana na tatizo la ajira nchini.

 

Mbene alisema viwanda 41 vilivyobinafsishwa vimefungwa kutokana na sababu mbalimbali.

 

 “Kwa viwanda vilivyofungwa, wizara imewasiliana na ofisi ya Mwanasheria Mkuu wa Serikali ili watoe maoni kwa mujibu wa maktaba wa viwanda vyao.

 

 “Nia ni kupata ushauri wa namna bora ya kuvifufua ikiwa ni pamoja na kuvitwaa na kuvirejesha Serikalini pale ambapo itaonekana ndiyo njia sahihi ili Serikali itafute mwendelezaji mwingine,” alisema

 

Alisema wizara yake kupitia Shirika la Viwanda Vidogo (SIDO), imepatiwa eneo na Halmashauri ya Ileje kwa ajili ya kujenga viwanda vidogo vya kusindika nafaka, kutengeneza maji ya kunywa, kiwanda cha biskuti na mafuta ya kula.

 

Mbene alisema mara taratibu zitakapokamilika, Halmashauri hiyo itawakaribisha wawekezaji wa viwanda vidogo ambavyo vitawezesha Wilaya ya Ileje na Mkoa wa Mbeya kwa ujumla kukua kiuchumi.