Yanga yaivuruga Simba kwa Sh90m

Geoffrey Mwashiuya

Waswahili husema, mwenye fedha siyo mwenzio! Hiki ndicho kinachoonekana kufanywa na klabu ya soka ya Yanga ambayo imetumia jeuri ya fedha msimu huu kuivurugia Simba kwenye usajili unaoendelea.

Mabingwa hao wa Ligi Kuu Tanzania Bara hadi sasa wametumia Sh90 milioni kuvuruga usajili wa watani zao wa jadi, Simba.

Kiasi hicho cha fedha kimetumiwa na Yanga kuwanasa wachezaji wanne waliokuwa kwenye mipango ya kusajiliwa na Simba msimu huu, lakini wakashindwa kutua Msimbazi kwa sababu ya dau.

Wachezaji hao ambao Yanga imewapokonya mdomoni mwa Simb ni Malimi Busungu, Geofrey Mwashiuya, Deus Kaseke na Mateo Simon.

Dau la usajili wa wachezaji hao na timu walizotokea kwenye mabano ni Busung, Sh25 milioni (Mgambo JKT), Kaseke, Sh35 milioni (Mbeya City), Mateo, Sh20 milioni (KMKM Zanzibar) na Sh10 milioni za usajili wa Mwashiuya kutoka Kimondo FC ya Ligi Daraja la Kwanza.(P.T)

Mshambuliaji Busungu aliliambia gazeti hili kuwa alishindwa kujiunga na Simba baada ya Yanga kumpa kiasi cha fedha alichokuwa anakihitaji bila kusitasita na ingawa Simba walizungumza naye wakafikiana.

“Simba nilizungumza nao, tukaelewena, lakini niliwatajia kiasi ninachokihitaji ili nisaini kwao wakawa wanajishauri. Mimi ni mchezaji, nategemea soka kuendesha maisha yangu. Yanga walitoka nyuma wakaja na ofa nzuri ambayo nisingeweza kuikataa,” alisema Busungu.

Mshambuliaji Simon aliyekuwa KMKM baada ya kung’ara kwenye mashindano ya Kombe la Kagame yaliyomalizika mwezi huu alinukuliwa wiki iliyopita akisema kuwa kabla ya kusajiliwa Yanga kwa dau la Sh20 milioni, Simba walitaka kumsanisha kwa Sh7 milioni.

Mshambuliaji huyo aliyeng’ara na Kikosi Maalumu cha Kuzuia Magendo kwenye mashindano ya Kombe la Kagame, alikuwa na nafasi kubwa ya kusajiliwa na Simba ambayo iliweka kambi Zanzibar, lakini Yanga ilimpandia dau mara tatu na kufanikiwa kumnasa.

Hata hivyo, Simba ilikanusha mara kwa mara kuwa ilikuwa inawahitaji wachezaji hao na kueleza kuwa wanalenga kutafuta umaarufu kupitia klabu hiyo.

Mkuu wa Idara ya Habari na Mawasiliano ya Simba, Haji Manara alisema klabu yao haijawahi kufanya mazungumzo na wachezaji hao na wala hawakuwa kwenye mipango yao.

“Hii ni tabia iliyoanza kuota mizizi kwa wachezaji wanaosajiliwa Yanga. Kila mchezaji anaposajiliwa huko anakuambia kuwa Simba walinitaka, lakini tulishindana dau,” alisema Manara.

Hata hivyo, hiyo siyo mara ya kwanza kwa Yanga kuipoka Simba mchezaji katika kipindi cha usajili kwani ilifanya hivyo kwa Mbuyu Twite, Kelvin Yondani na hata Mganda Emmanuel Okwi.