TONTO DIKEH ADAIWA KUOLEWA NA TAYARI NI MJAMZITO

MIEZI kadhaa iliyopita, nyota wa filamu wa Nollywood, Nigeria, Tonto Dikeh, alithibitisha kwamba alikuwa karibu kuolewa, jambo ambalo alilitoa hadharani muda mfupi baada ya uhusiano wake na Churchill Oladunni maarufu kama Mr. X kuvurugika.

Katika kuimarisha kauli yake, mwigizaji huyo ambaye pia ni mwimbaji, alionekana akiwa na pete ya uchumba, ambapo alipoulizwa alisema kwa furaha kwamba alikuwa amechumbiwa na alikuwa karibu kuolewa.
Ripoti zinasema wachumba hao walikuwa wanatarajiwa kufunga ndoa yao huko Cape Town, Afrika Kusini, au nchini Scotland. Hata hivyo, inasemekana tayari mwigizaji huyo mzaliwa wa Jimbo la River State na Mr X wake, wamefunga ndoa kimyakimya.

Katika kukamilisha hilo, Tonto Dikeh yu mjamzito akitegemea kujifungua mtoto wake wa kwanza, pia ameweka kwenye akaunti yake ya Instagram picha ya kitumbo chake kilichotokeza na kuonyesha matokeo ya vipimo vya kuonyesha ujauzito wake.

Mtandao wa Nigeriafilms.com pia ulionyesha kwamba Pokolee, kama anavyoitwa na mashabiki mwigizaji huyo, amebadili jina lake kwenye Instagram yake na kuwa Mrs. Tonto W.C Dikeh D*
Itakumbukwa kwamba uhusiano wa Tonto na Mr. Churchill uliingia mushkeli baada ya mwanamke mmoja kudai kwamba ni mke wa mwanamme huyo ambapo alionyesha hata picha mbalimbali kuthibitisha hilo. Lakini Mr. X alijibu haraka na kusema kwamba walikuwa wametalikiana zamani na hivyo jambo hilo kuzimwa haraka kwa njia hiyo.