Cambiaso, Borini Wapigiwa Hesabu Upton Park

Wagonga nyundo wa jijini London, West Ham wameamua kujitosa kumuwania kiungo kutoka nchini Argentina, Esteban Cambiasso aliyekataa kuendelea kuitumikia Leicester City.

West Ham Utd wamemuweka kiungo huyo katika orodha ya wachezaji wanaohitajika huko Upton Park, katika kipindi hiki cha usajili wa majira ya joto huku wakiamini itakua ni rahisi kwao kumpata kutokana hitaji lake la kutafuta mahala pengine pa kucheza soka lake.

Mchezaji mwingine anaewaniwa na wagonga nyundo hao wa London kwa sasa ni mshambuliaji kutoka nchini Italia, Fabio Borini ambaye kwa sasa yupo huru bada ya kumaliza mkataba wa kuitumikia Liverpool.

Tayari West Ham Utd wameshakamilisha usajili wa baadhi ya wachezaji kama Manuel Lanzini, Dimitri Payet, Pedro Obiang, Stephen Hendrie, Angelo Ogbonna pamoja na Carl Jenkinson.

Meneja mpya wa klabu hiyo Slaven Bilic ameonyesha dhamira ya kukisuka vilivyo kikosi chake, kutokana na ushindani uliopo katika ligi ya nchini England, na anaamini endapo atafanikiwa kumnasa Borini pamoja na Cambiasso mipango yake itakwenda sawia.